NLW MS. Peniarth 11 – page 251r

ymi gewilyd. Ac myn y gret a|dyly duỽ ymi ny rof|i vy ỻaỽ arnaỽ

ef hediw ym|blaen laỽnslot. ony|byd rac dy lidyaỽ di. kanys nyt oed

enryded ymi dechreu ym|blaen y geniuer milỽr da yssyd yman.

Owein heb y brenhin a|roy di dy laỽ ar y kwarel. Arglwyd heb ef

nyt oes dim nys|gỽnelỽn i yrot ti os gaỻỽn. am hynn eissyoes yr

duỽ na|chymeỻ di vyui o|e|wneuthur. Sagamor heb y brenhin. a

veỻy ditheu. beth a|wneỽch chỽi. Arglỽyd heb ỽynteu pan|darffo y

laỽnslot provi tynnu y kwarel ni a|wnaỽn yr hynn a vynnych. ac

o|e vlaen efo nyt aỽn ni os da gan duỽ. a vnbennes heb·yr arthur

ymbil a|laỽnslot am vynet. a|gỽedy hynny ef a|a y ỻeiỻ o|r byd reit.

Laỽnslot heb y vorwyn yr mỽyn y neb mỽyaf a|gereist eiryoet. ~

na nackaa vi yn yr hynt honn. ac o|r byd reit y ỻeiỻ a|e kanhat+

taant. ac ny chaf|inneu arglỽyd hirdrigyaỽ yma. a vnbennes

heb·y laỽnslot pechaỽt yỽ ytt vyn|tynghetuennv o|dim yn|y byt.

kanys y|mae ryỽ vilwyr yma a|m go·ganeynt i. ac a|m gelw+

ynt yn|vostyỽr ot aỽn i yn eu|blaen. Nac oes myn vyng|cret

heb y brenhin. namyn mỽy y|th ganmolant yn|ỻe dy gỽrte+

yssi. a|heuyt clotuaỽr ac enrydedus yỽ y|ttitheu o|r geỻy y tyn+

nv. ac alussen yỽ kymhorth morwyn heuyt. ac yr|ỽyf|inneu

y|th wediaỽ yr y gret a|dylyy|di ymi ar roi dy laỽ ar y kwarel

ym|blaen y ỻeiỻ. Laỽnslot ny mynnaỽd torri gorchymyn y bren+

hin. ac ygyt a|hynny heuyt ef a|doeth cof idaỽ y dynghetuen+

nu o|r vorwyn ef yr mỽyn y neb mỽyaf a|garyssei eiryoet. a

dilis nat oed dim kymeint a|garei ef a|r vrenhines kyt bei marỽ.