NLW MS. Peniarth 32 (Y Llyfr Teg) – page 133
Llyfr Iorwerth
133
y lygat; y draean gỽerth. a|r traean araỻ ar y ỻy+
gat araỻ. Pob anaf ar varch y draeanwerth. y am
y glust a|e goloren. Pỽy bynnac a|ladho raỽn
march; rodet varch araỻ o|e berchennaỽc y wne ̷+
uthur ac ef yr vn·ryỽ vỽynant ac a|wnelei a|r
eidaỽ e|hun. yny dyfo y raỽn ual kynt. ac ynteu
yn segur. Mỽng march; vn werth a|e frỽyn.
Sef yỽ hynny; pedeir keinhaỽc kyfreith. a|e talkudyn
yn vn werth a|e gebystyr; keinhaỽc kyfreith. Pỽy byn+
nac a venffyckyo march y araỻ. a gỽynoui y
bleỽ y ar y gefyn; pedeir keinhaỽc kyfreith. a|dal. O|r
tyrr y croen a|r kic; ỽyth keinhaỽc kyfreith. O thyrr y
croen a|r kic hyt yr asgỽrn; vn ar bymthec kyfreith. a|dal.
Pỽy bynnac a varchocco march heb ganhat; ta+
let pedeir keinhaỽc esgyn. a|phedeir o bop randir
y marchocco drostaỽ. ac ny dylyir amdisgynnu.
kanys jaỽn yỽ disgynnu kan esgynnỽyt. a|hyn+
ny y perchennaỽc y march. a chamlỽrỽ y|r arglỽyd.
Pỽy bynnac a locco march. kyt bo marỽ ganth+
aỽ; ny dyly namyn y lỽ gỽneuthur idaỽ kystal
ac yr eidaỽ e|hun. a thalu y loc O deruyd y|dyn
ỻogi march ac enwi hyt yd el ac ef. os tros hynny
yd|a ac ef; talet hanner yr elỽ y berchennaỽc y
march. ac ueỻy os da araỻ. ac aghyfuarch y|r
arglỽyd. O deruyd cloffi march ym menffic. neu
vriỽ araỻ; roder march kystal ac ef ymdanaỽ
| « p 132 | p 133a » |