Llsgr. Caerdydd 3.242 (Hafod 16) page 107

a|grewyt. Pỽy a|gladwyt y|nghaỻon y vam. Adaf a|gladỽyt

yn|y daear. Pỽy. a|vedydywyt y|nghaỻon y vam gỽedy y

varỽ. adaf. Pỽy yssyd yn wylaỽ yn wastat ym|paradwys.

Ely. ac enoc. Pỽy gyntaf a alwaỽd enỽ yr arglỽyd. Enoc.

Pỽy a|vu uarỽ ac ny anet. adaf. Pỽy enweu y pedeir se+

ren. y kaffat enỽ adaf ohonunt. anatoloe. disis. arids.

Menfebrios. Pỽy enweu y pedeir auon a redant trỽy bara+

dỽys. Tigris. Seon. ffison. Euffrates. Pỽy a rodes ỻaeth. ac

ny|s kymerth. Eua. Pỽy a|offrymaỽd y duỽ o|r daear yn gyn+

taf. abel a offrymaỽd oen. Pỽy gyntaf a lygraỽd y daear.

Kayn pan ladaỽd y vraỽt abel. Pỽy yr offeiryat kyntaf

a|vu. Melchisedech. Py saỽl mab a|vu y adaf. Deng|meib

ar|hugeint. a deng merchet ar|hugeint. ac abel. a|chayn

yn ychwanec. Pỽy gyntaf a rodes ỻythyr. Enoc braỽt

lareth. a thrugeint mlyned a thrychant y buant yn pres+

sỽylaỽ ar y daear. Py saỽl blỽydyn y bu noe yn gỽneuthur

y long. Deu cant mlyned. a thrychant kufut vu y hyt.

a dec ar|hugeint vu y ỻet. a|dec kufut ar|hugeint vu y hu+

chet. Py saỽl diwarnaỽt y parhaaỽd glaỽ dilyw. Deugein

niwarnaỽt. Pỽy gyntaf a|blannaỽd gỽinỻan gỽedy di+

lyỽ. Noe. Pỽy gyntaf a|gant aỻeluya. Dauyd vrenhin.

Pỽy a|e kafas. Selyf. Pỽy a|vu diagon gyntaf. Seint

ystyphan. Pỽy a|wnaeth manachlaỽc gyntaf. Paỽl ueu+

dỽy. a seint aỽtỽin benet. Pỽy a vu dryssaỽr gyntaf. The+

odolus. Pỽy y subdiagon kyntaf a vu. alobus. Paham

y gỽnaethpỽyt gỽreic o assen mỽy noc o aelaỽt araỻ. am

y bot yn|gymherued. Ac ỽrth hynny ny dyly gỽreic ysgynnu

Cardiff MS. 3.242 (Hafod 16) – page 107