Breudwd Welsh Prose 1300-1425
Cymraeg

Oxford Jesus College MS. 111 (The Red Book of Hergest) – page 169r

Peredur

169r

685

Pei|dylyedus diuetha kennat. nyt aut drache  ̷+
uyn yn vyỽ att dy arglỽyd. am erchi arch mor
drahaus y vrenhined a ieirỻ a|barỽneit a
dyuot y wrhau y|th arglỽyd di. Peredur
a|erchis idaỽ vynet dracheuyn attunt. a rodi
dewis udunt ae gỽrhau idaỽ. ae ymwan ac
ef. Wynt a|dewissassant ymwan ac ef. A phe+
redur a|uyrryaỽd perchen cant pebyỻ y|dyd
hỽnnỽ y|r ỻaỽr. a thrannoeth a vyryaỽd per+
chen cant ereiỻ y|r|ỻaỽr. A|r|trydyd dyd cant a
gaỽssant yn|eu|kyghor gỽrhau y peredur.
a|pheredur a|ovynnaỽd udunt. Beth a|wneynt
yno. ac ỽynteu a|dywedassant panyỽ gỽarch+
adỽ y pryf yny vei varỽ. ac yna ymlad a|w+
naem ninneu am y maen. a|r neb a uei dre+
chaf ohonam a|gaffei y maen. Arhoỽch vi
yma heb·y peredur mi a|af y ymwelet a|r
pryf. Nac ef arglỽyd heb wynt. awn
ygyt y ymlad a|r pryf. Je heb·y|peredur
ny mynnaf|i hynny. Pei ỻedit y pryf ny
chaffỽn i o|glot vỽy noc un o·honaỽch
chwitheu. A mynet a|wnaeth ef y|r|ỻe yd
oed y|pryf a|e lad. a|dyuot attunt wyntev.
a|dywedut ỽrthunt. Kyfriuỽch aỽch treul
yr pan|doethaỽch yma. a|mi a|e talaf yỽch
ar eu* heb·y peredur. Ef a|dalaỽd udunt ky+
meint ac a|dywaỽt paỽb y|dylyv ohonaỽ.
Ac nyt erchis u·dunt namyn adef eu|bot
yn|wyr idaỽ ef.  Ac ef a|dywaỽt ỽrth et+
lym. att y wreic   vỽyhaf a|gery yd|ey di.
a|minneu a|af ra·gof. ac a|dalaf itt dyuot
yn|ỽr im. Ac yna   y rodes ef y|maen y et+
lym. Duỽ a|dalho   itt. a rỽydheyt duỽ ra+
got. ac ymeith yd   aeth peredur. ac ef a
doeth y|dyffryn a·uon deckaf a|welsei ei+
ryoet. a ỻawer o|bebyỻeu amliỽ a|welei
ef yno. a ryuedach   oed gantaỽ no|hynny
gỽelet y saỽl a|welei o|velineu dỽfyr. a  ̷
melineu gỽynt.  Ef a|gehyrdaỽd ac ef
gỽr gỽineu maỽr   a gỽeith saer arnaỽ.
A govyn pỽy oed a|oruc peredur. Penn meli+
nyd ỽyf|i heb ef ar y melineu racko oỻ.
a|gaffaf|i letty gennyt   ti heb·y|peredur.
Keffy heb ynteu yn|ỻawen. ef a|doeth peredur
y ty y melinyd. Ac ef a|welas ỻetty hoff
tec y|r melinyd. ac erchi a|wnaeth peredur

686

aryant yn|echwyn y|r melinyd y brynu bỽyt
a|ỻynn|idaỽ ac y|dylwyth y ty. ac ynteu a|ta+
lei idaỽ kynn|y vynet odyno. Gouyn a|oruc
y|r melinyd py achaỽs yd|oed y dygyuor
hỽnnw yno. Y dywaỽt y melinyd ỽrth peredur.
Mae y neiỻ peth. ae tydi yn ỽr o|beỻ. ae|titheu
yn ynvyt. Yna y mae amherodres cristinobyl
uaỽr. ac ny mynn honno namyn y gỽr dew+
raf. kanyt reit idi hi da. ac ny eỻit dỽyn bỽ+
yt y|r saỽl vilioed yssyd yma. ac o|achaỽs
hynny y mae y saỽl veli·neu hynn. A|r nos
honno kymryt eu hessmỽythter a|wnaeth+
ant. A thrannoeth kyuodi y uynyd a|oruc
peredur. a|gỽiscaỽ ymdanaỽ ac ymdan y uarch
y uynet y|r tỽrneimeint. ac ef a|welei bebyỻ
ymplith y pebyỻeu ereiỻ teckaf o|r a|welsei
eiryoet. a morỽyn dec a|welei yn ystynnv
y phenn trỽy ffenestyr ar y pebyỻ. Ac
ny|welsei eiryoet morỽyn|degach. ac eur+
wisc o|bali ymdanei. ac edrych a|wnaeth ar
y uorỽyn yn|graff. a mynet y|charyat yndaỽ
yn|vaỽr. ac ueỻy y|bu yn edrych ar y uorỽyn
o|r bore hyt hanner dyd. ac o|hanner dyd yny
oed pryt naỽn. Ac yna neur daroed y tỽrnei+
meint. a|dyuot a|oruc y letty. a|thynnu y
arueu y amdanaỽ. ac erchi aryant y|r me+
linyd yn|echwyn. A dic vu wreic y melinyd
ỽrth peredur. ac eissoes y melinyd a|rodes ary+
ant yn echwyn idaỽ. A thrannoeth y gỽ+
naeth yr vn|wed ac a|wnathoed y dyd gynt.
a|r nos honno y|doeth y letty ac y|kymerth a+
ryant yn echwyn y|gan y melinyd. a|r try+
dyd dyd pan yttoed yn yr vn|ỻe yn|edrych ar y
uorỽyn. ef a|glywei dyrnaỽt maỽr rỽng ysgỽ+
yd a mynỽgyl idaỽ a|mynybyr bỽyaỻ. a|phan
edrychaỽd dra|e|geuyn ar y melinyd. Y melin+
yd a|dywaỽt ỽrthaỽ. Gỽna y neiỻpeth heb
y melinyd. ae tydi a|dynho dy benn ymeith
ae titheu a|el y|r tỽrneimeint. A gowenv a|w+
naeth peredur. ar y melinyd. a|mynet y|r tỽrneyme+
int. ac a|gyuaruu ac ef y|dyd hỽnnỽ. ef a|e by+
ryaỽd oỻ y|r ỻaỽr ỽynt. a chymeint ac a|vyry+
aỽd ef a|anuones y gỽyr yn anrec y|r amherod+
res. a|r meirch a|r arueu yn anrec y wreic
y melinyd. yr ymarhos am|y|haryant echwyn.
Dylin* a|oruc peredur y tỽrneimeint yny vyry+
[ aỽd