Oxford Jesus College MS. 119 (The Book of the Anchorite of Llanddewi Brefi) – page 129v
Breuddwyd Pawl
129v
1
yd. Ac amylder o|dagreu. a chỽynnvan callonn. ac
2
oeruel maỽr drỽy losgedigaeth eneideu. Yno y|mae
3
rot o dan a mil o yrd arnei a|diefuyl a|e try vnỽeith
4
beunyd. Ac ar bop gỽeith y|lloskit mil o eneidev. ~
5
Odyna y|gỽelas paỽl avon aruthyr yn llaỽn o|bryf+
6
uet kythreulic. megys pyscaỽt yn|y mor yn llygkv
7
eneidev pechaduryeit megys bleideu yn llyngkv de+
8
ueit. Ac ar yr auon honno yd oed bont yd aei yr enei+
9
deu kyfyaỽnn idi yn didramgỽyd. Ac eneideu y|pech+
10
aduryeit a|dygỽydynt yndi. llaỽer ysyd o|bressỽyl+
11
vaeu drỽc yn vffernn. megys y|dyỽedir yn|yr euegyl.
12
Rỽymỽch ỽynt yn fagleu o|e llosci. yno y|poenir ky+
13
ffelyb gyt a|e gyffelyb. godinebus y|godinebus. treisỽyr
14
gyt a|threisỽraged. Enỽir gyt a enỽiryon. a|pha+
15
ỽt a|gerdei yr bont honno herỽyd y|gobrynei. Ac
16
yno y|gỽelas paỽl llaỽer o|eneideu ym poen. Rei o+
17
honunt hyt y|glinnyeu. Ereill hyt y bogel. Ere+
18
ill hyt y|gỽeuussev. Ereill hyt y|hayleu. Ereill hyt
19
ygỽarthaf y|pennev. yna yd|ỽylaỽd paỽl. Ac y|gofy+
20
naỽd yr angel pỽy oedynt y|rei hynny. heb agel
21
yna. y|rei a|ỽely di hyt y|glinnyev a|oganant ere+
22
ill. pann elont yr eglỽysseu. a|rei a|ỽely di hyt y|bo+
23
gel a|ỽnaethant pechaỽt godinebus. ac ny|s penyty+
24
assant hyt aghev. E|rei a|ỽely ti hyt y|gỽefusseu.
25
a oganassant yn eglỽysev heb ỽaranndaỽ geireu
| « p 129r | p 130r » |