Breudwd Welsh Prose 1300-1425
Cymraeg

Oxford Jesus College MS. 119 (The Book of the Anchorite of Llanddewi Brefi) – page 136r

Efengyl Ieuan, Y Drindod yn un Duw

136r

1
des vdunt allu a|medyant o|e bot ynn|veibon y|duỽ.
2
Ac ny dichaỽn neb dỽyn y|arnnaỽ y|vreint onny|s mynn
3
e|hun. Nyt y|rei anner o|waedeu o gyt·gỽr a|gỽreic.
4
Sef yỽ hynny y|rei ny anner o|bechodeu nac o|eỽyllus
5
y|knaỽt. Namyn y|rei a|aner o|duỽ. Cannys y|neb
6
a aner o|duỽ. A enir o|rat yr yspryt glan. A|rei a a+
7
ner o ỽeithret gỽr a gỽreic a ennyn o ỽeithret kna+
8
ỽdaỽl. A chynn y vot yn vab y|duỽ reit yw idaỽ y
9
dadeni trỽy dỽfyr y|bedyd. A rat yr yspryt glan.
10
Ar geir a|ỽnaethpỽyt yn gnaỽt. Sef yỽ hynny duỽ
11
a|ỽnaethpỽyt yn dyn. Ac a pressỽylaỽd ynom ni.
12
Sef yỽ hynny yn plith ni. A ni a|ỽelsam y ogogonnyant*
13
ef. Yr honn ny allei neb y gỽelet onny bei ỽiscaỽ oho+
14
naỽ ef gnaỽt dyn. A|e ogonnyant ef megys gogo+
15
nyant vn mab duỽ a anet o duỽ kyfulaỽn o rat.
16
a gỽironed. Canys y|dynyolyaeth ef a|e eneit a|rod+
17
det yr holl radeu. ar holl ỽyboteu yr hỽnn ny rodet
18
y|neb eithyr idaỽ e|hun a|hynny yn hollaỽl. ~ ~
19
*DAngos py ỽed y|dyellir y|tat ar|mab. Ar|yspryt
20
glan yn duỽ. KYnn bo perffeithach duỽ no chrea+
21
dur o|r byt. A hynny o|ffyrd heb rif arnunt. Eisso
22
ny allỽn ni na deall y|perffeithrỽyd ef na|e dyỽet+
23
dut ar yn tafaỽt onnyt trỽy kyffelybrỽyd y|pe+
24
theu a|ỽelỽn ac a|deallỽnn yn|y creaduryeit. Ac yn
25
ennỽedic yn dyn a ỽnnaethpỽyt ar delỽ duỽ.

 

The text Y Drindod yn un Duw starts on line 19.