Oxford Jesus College MS. 57 – page 99
Llyfr Blegywryd
99
y teilyngaf a|seif idaỽ. a|r braỽdỽr a|gyỻ camlỽrỽ.
T Ri dyn ny aỻant ymwystlaỽ yn erbyn
braỽt trỽy gyfreith. vn yỽ. brenhin y
ỻe ny aỻo herỽyd kyfreith sefyỻ y|myỽn dadyl
geyr bronn braỽdỽr y holi neu y atteb trỽy vre+
int anyanaỽl. neu trỽy vreint y dir mal breyr
neu araỻ. Eil yỽ. dyn eglỽyssic rỽymedic yn
urdeu kyssegredic. Trydyd yỽ. dyn eglỽyssic rỽ+
ymedic yng|kreuyd. kany|dichaỽn neb herỽyd
kyfreith rodi gỽystyl yn erbyn braỽt onyt dan
berigyl gỽerth y dauaỽt. ac nyt oes werth gos+
sodedic yng|kyfreith howel da ar aelaỽt. a gỽa+
et. a|sarhaet dyn eglỽyssic. ac ỽrth hynny ny
eiỻ neb ohonunt ỽy rodi gỽystyl yn erbyn
braỽt. na|chyt a|braỽt. Hoỻ argywed segyrffyc
a|wneler y|r eglỽysswyr a dylyir y emendau
udunt yn|y|sened herỽyd kyfreith eglỽyssic.
TRi pheth a|dyly pob braỽdỽr y waran+
daỽ y gan y kynhennwyr kynn bar+
nu y neb o·honunt yn enniỻ nac yn goỻet
| « p 98 | p 100 » |