Breudwd Welsh Prose 1300-1425
Cymraeg

NLW MS. Llanstephan 27 (The Red Book of Talgarth) – page 157r

Dylanwad y Lleuad

157r

Y * dyd kyntaf o loer eindyd. pob gỽeith o|r a|wneler
cryno vyd. nyt oes y vỽyn mynet att y brenhin.
na gỽneuthur kedymdeithyas. na mynet y|r gorỻewin.
na dechreu gỽers. na chaethau yngnadaeth. na chynnal
ỻe. na phlannu gỽyd. Pob|peth o|r a|welych drỽy dy hun.
yn ỻewenyd y try. O|r genir mab arderchaỽc vyd. ac astut
a|chaỻ a ỻythyraỽl. ac y|myỽn dỽfyr vyd y berigyl. o|r die+
ingk ynteu hir vyd y oes. os merch a enir hi a vyd
diweir. a hygar a thec. a rangkbodus gan wyr. Pỽy|bynnac
a|glefycho hir y|byd claf. a|r vreudỽyt a|welych yn ỻewenyd
y try. ac o|th wely yn goruot. ti a|oruydy dy alon herỽyd brat.
ỻeihau dy waet y dyd hỽnnỽ da yỽ. Salym. Beatus martyr.
Yr eil·dyd o|r ỻoer. pob peth o|r a|wnelych. cryno vyd. Prynu
a gỽerthu. ysgynnv myỽn ỻong. mynet y hynt. heu hat+
eu. O|r genir mab. kaỻ vyd. a ratlaỽn ac astut. o|r genir
merch. detwyd vyd. Y ỻetrat a|wneler. ebrỽyd y keffir. y bre+
udwyt a|welych. na choela idaỽ na da na drỽc vo. nyt da
goỻỽng gỽaet y dyd hỽnnỽ. Gỽers. Astiterunt.
Y trydyd dyd o|r ỻoer. pob peth o|r a|vynnych y wneuthur
reit yỽ peidyaỽ ac ef. Na hea dy ard. kanys ỻysseu diffrỽ+
yth a|dỽc. Y ỻetrat a|wneler. ebrỽyd y keffir y wybot. Pỽy
bynnac a glefycher. ny chychwyn vyth. Y mab a|aner.
maỽr·vrydic vyd. a chwannaỽc y da ereiỻ. odidaỽc yỽ
y vot yn hen. ac ny byd marỽ o angeu da. Merch o|r ge+
nir ỻafuryus vyd. a chwannaỽc y wyr. ac ny byd gỽrach.
Breudwyt a|weler. gỽac vyd. nyt da goỻwng gỽaet na|r
dyd hỽnnỽ na|r nos. Y pedweryd dyd o|r|ỻoer. da yỽ dodi

 

The text Dylanwad y Lleuad starts on line 1.