NLW MS. Llanstephan 27 (The Red Book of Talgarth) – page 26v
Ymborth yr Enaid
26v
1
hynny y gelwir ỽynt yn|uarwolyon. Sef yỽ angeu y|r eneit
2
gỽahanu duỽ y ỽrthaỽ. yr|hỽnn yssyd vywyt y|r eneit. ka+
3
nys megys y bywhaa yr eneit y corff a hebdaỽ y marw+
4
heir. Veỻy y bywhaa duỽ yr eneit. a hebdaỽ y byd marỽ.
5
ac ueỻy angeu y|r|eneit yỽ gỽahanu duỽ y ỽrthaỽ drỽy
6
bechaỽt marwaỽl. Seith brifwyt pechaỽt marỽaỽl yssyd.
7
ac a|eỻir eu dyaỻ drỽy vn geir seith·lythyraỽc. gan gymryt
8
geir kyvan o bop ỻythyren o|r geir. Sef yỽ y geir bakagiỻ.
9
o|r b. kymer balchder. o|r a. kymer anghaỽrder. o|r k. kym+
10
mer kynghoruynt. o|r a. araỻ kymer aniweirdeb. o|r g.
11
kymer glythineb. o|r J. kymer irỻoned. o|r ỻ. kymer ỻesged
12
Ac ueỻy o|r|vn geir kymer y seith brifwyt pechaỽt. sef yỽ
13
hỽnnỽ bakagiỻ. ~ ~ ~ ~ ~ ~
14
T Raether beỻach am bop un ohonunt ar neiỻtu. drỽy
15
dangos hyspysrỽyd am bop vn ohonunt ac eu ke+
16
ingyeu. ac yn gyntaf am valchder. yr|hỽnn yssyd dechreu
17
y bop drỽc. Balchder yỽ gormod garyatchwant trahaus
18
ỽrth vaỽrhau priaỽt berson. drỽy wytyus uchelder medỽl.
19
y dremygu a vo is. ac anodef a|vo vch. a mynnv gostỽng
20
y gyfuch. a|bot yn arglỽyd arnaỽ. vn geingk ar|bymthec
21
yssyd y valchder. Nyt amgen ymchwydaỽ. bocsachu. ym ̷+
22
dyrchauel. an·ostỽng. drudannyaeth. ymwychyaỽ. kyn+
23
hennu. an·odef. an·uvuddaỽt. tremyc. rac·ymgym·ryt.
24
keỻweir. geugrefyd. traỻavaryaeth. tra·achub. clot orw+
25
ac. Ymchwydaỽ yỽ. ym·wrthlad yn|dremygus ac aỽdur+
26
daỽt neu orchymynneu prelatyeit neu henafyon. Bocsa+
27
chu yỽ ymwneuthur o|dyn bot yn eidaỽ y peth nyt ydiỽ.
| « p 26r | p 27r » |