NLW MS. 3035 (Mostyn 116) – page 89r
Brut y Brenhinoedd
89r
ỽrtheyrn y geissaỽ diogel amdiffyn. Y casteỻ hỽnỽ a oed
yn ergig ar lan yr afon a|elwir gỽy y|mynyd elorach
A gỽedy dyfot Emrys hyt y|ỻe hỽnỽ; gan goffau y vrat+
ỽryaeth a|wnathoedit y tat a|e vraỽt ef a|dywat ỽrth
eidol iarỻ kaer loyỽ. ha tywyssaỽc bonhedic syỻ ti
muroed y gaer hon a|e chedernyt A|tebygu ti gaỻu o+
honunt ỽy amdiffyn gỽrtheyrn na chaffỽyf|i kudyaỽ
aỽch pen vyg gleif inheu yn|y amyskaroed ef Ac ny
thebygaf inheu na ỽyppych|ti hadu* ohonaỽ ef hyny. ka+
nys o|r hoỻ dynyon yscymunedickaf yỽ ef A|theilygaf
o amryfael boeneu. kanys yn gyntaf ef a vrydychaỽd
vyn tat. i. Gustenhin. Ac odyna constans vym mraỽt
yr hỽn a oruc ef yn vrenhin hẏt pan vei haỽs idaỽ y
vredychu Ac o|r diwed oỻ. drỽy y vrat a|e tỽyỻ gỽedy
y vot yn vrenhin ef a duc y paganyeit ar tor y brytan+
yeit hyt pan aỻei ynteu distryỽ y neb a vei fydlaỽn
imi Ac eissoes yny kanhatto duỽ. ef e|hun a|dygỽyd
yn|y|magal. ac yn yr hoenyn a|paratoes ef y|m fydlon+
yon inheu. kanys gỽedy gỽybot o|r saesson y tỽyỻ eff a|e
enwired. ỽynt a|e byryassant ef o|e vrenhinyaeth yr hyn
nyt reit y|neb y gỽyna. Hyn yssyd gỽynuanus ry|daruot
y|r yscymunedic bobyl a ohodes yr yscymun vradỽr hỽnỽ
gỽereskyn a|diwreidaỽ y bonhedigyon kiỽtaỽtwyr dy+
lyedaỽc Anreithaỽ a orugant y ffrỽythlaỽn dayar a|dis+
tryỽ yr eglỽysseu a|dileu y|gristynogaeth hayach o|r mor
y gilyd. Ac ỽrth hyny yn|aỽr y|kiỽdaỽtwyr gỽneỽch whith+
eu yn ỽraỽl. a|dielỽch arnaỽ ef yn gyntaf drỽy yr hỽn
y|damweinaỽd y|drygeu hyn oỻ. Ac odyna ymchoelỽn
an arueu yn erbyn an gelynyon a rydhaỽn an|gỽlat
y|gan eu gormes Ac ny bu vn gohir trỽy amryfalyon
| « p 88v | p 89v » |