NLW MS. Peniarth 9 – page 57v
Ystoria Carolo Magno: Pererindod Siarlymaen
57v
1
*PAn yttoyd charlys y gỽylua y sulgỽyn
2
yn seint dynys yn gỽisgaỽ coron y vren+
3
hinyayth am y benn. Ac yn gỽiscaỽ cle+
4
dyf y ternas am y ystlys ar warthaf y gỽis+
5
goyd maỽrweirthaỽc. Ar berson vrenhina+
6
ỽl. Ar ansaỽd vrenhined a deckeynt ac a hoff+
7
ynt yr adurn o dieithyr. Ac ar hyny y bren+
8
hin ardyrchaỽc a|dywaỽt ỽrth y wreic yr
9
hon y credei ef rybuchaỽ o·honei a damunaỽ
10
ymlayn neb y vot yn yr ansaỽd honno. ỽy
11
karediccaf|i a weleisti neu a glyweist neb vn
12
dyrchauedic ar lywodrayth tyernas mor
13
wedus cledyf ar y ystlys ar meu i kyn von+
14
edigeidet yd amgylchyno coron kylch y ben
15
ar meu i. A hitheu gan edrych yn|y chylch
16
a attebaỽd yn ry uuan gan deuaỽt gỽrei+
17
gaỽl. na weleis arglỽyd heb hi. Minheu a gig+
18
leu bot vn pei as gỽelut ti euo yn adurn bren+
19
hinyaỽl y gorffỽyssei dy holl vocsach di her+
20
wyd hoffter y berson y uoned ynteu a gyua+
21
deuynt ragori rac y teu di. Ar atteb an+
22
nosparthus hỽnnỽ a gyffroes y brenhin ar
23
lit ac Jrlloned. ac yn bennaf oll o vot y saỽl
24
wyrda a oyd yn|y gylch yn gỽarandaỽ yr a+
25
madraỽd. Reit yỽ itti heb ef menegi y mi
26
y brenhin kymeint y ardyrchogrỽyd a|y vo+
27
ned ar hỽn. a dywedeist. A ninheu a gyrchỽn
28
parth ac attaỽ ef val y bernych di am gỽyr+
29
da inheu gỽedy an|gỽeloch gyuarystlys yr
The text Ystoria Carolo Magno: Pererindod Siarlymaen starts on line 1.
| « p 57r | p 58r » |