Llsgr. Caerdydd 1.363 (Hafod 2) – tudalen 105r
Brut y Brenhinoedd
105r
peth wrth y kynghor. Ac gwedy mynegy yr br+
enyn e kennadwry honno da wu ganthaỽ kanys
o|e anỽod e bv reyt ydaỽ ellwg heyngyst y wrthaỽ.
Ac o|r dywed ef a erchys yr brytanyeyt ac yr saysson
dyvot y gyt dyw kalanmey. e terỽyn oed en dyỽ+
ot en agos hyt em mynachloc ambyr y lỽnyethv
eno ev tangnheỽed ar saysson. Ac gwedy darỽot llỽ+
nyethv a gossot pob peth o henny a|e kadarnhaỽ o pob
parth heyngyst a arveravd o newyd vrat. ac a orchy+
mynnỽs o|y kytỽarchogyon kymryt kyllell hyr o
pob vn o·nadvnt a dody en eỽ hossanneỽ ygyt ac eỽ hysce+
yryeỽ. a phan vydynt e brytanyeyt en eỽ kyfrỽch heyn+
gyst a dywedey wrthvnt wyntev er arwyd hwn. Nym
ev yre saxes. sef yw henny kymervch e kyllyll. Ac ena e
bydey paravt pob vn o|r saysson y lad e kymro a vey ne+
ssaf ydaỽ. A hep ỽn gohyr wynt a deỽthant yr dyd ac
yr lle gossodedyc hvnnỽ a dechreỽ eỽ datleỽ a wnaeth+
ant. ac gwedy gwelet o heyngyst avr ac amser kyvar+
tal ganthaw y danllewychỽ y vrat ef a dywaỽt wrth y
kytemdeythyon. kymerwch ech kyllyll. Ac en e lle e k+
ymyrth ef Gortheyrn erbyn y vantell ac y delys. Ac y
gyt ac y clywssant e saysson er arwyd tynnỽ eỽ kyllyll a
orỽgant a chyrchỽ e tywyssogyon ar brytanyeyt a ody+
nt en dyarỽot hep tebygỽ dym o|r brat hvnnỽ ac ev llad
ena tryvgeyn wyr a phedwar cant o tywyssogyon a
| « p 104v | p 105v » |