LlGC Llsgr. Peniarth 12 rhan ii – tudalen 51v
Ystoria Lucidar
51v
enweu y rei gỽynuydedic. ual y gỽybu y kyfoethaỽc enweu y+
vream a lazar. discipulus A wediant ỽy yr eneidyeu dros eu|kereint.
Magister Y rei gỽirion a wediant dros y rei a|garassant yn|yr arglỽ+
yd. neu dros y rei a|alwei arnunt y eu|diffryt rac drỽc. ac y
eu rydhau o brofedigaeth y|byt. ac y eu hemendau ot ydynt
yng|kyveilyorn. megys y delynt y kedymdeithyon ar|hynt.
discipulus Pa delỽ y gỽediant ỽy. Magister Eu|damunet ỽy vyd eu gỽedi.
kanys beth bynnac a|damunont ỽynt a|e kaffant yn dian+
not. a|e gỽedi ỽynteu yỽ presentyaỽ y grist poeneu y corff.
neu y da a|wnaethant yrdaỽ. ac eissyoes ny wediant ỽy dim
o·nyt a|ganhattyo duỽ yrdunt. ac o|r|gỽediynt yn amgen ouer
vydei udunt. discipulus a ydynt ỽy yn eu|kyflaỽn lewenyd. Magister Nac yt+
ynt. namyn megys dynyon a|wahodit y wled. ỽynt a|vydant
lawen pan delont am eu|derbyn. goualus vydant am|eu|kedym+
deithyon yn trigyaỽ. pan|delont ỽy hagen y·gyt y byd mỽy
eu ỻewenyd. veỻy y mae eneidyeu y seint yr aỽrhonn. yn|ỻaỽ+
enhau yn eu gogonyant. ac yn hir ganthunt am·danam
ninneu. a|phan gymeront eu corfforoed a|dyuot paỽb y·gyt. yna
y kymerant eu kyflaỽn lewenyd. discipulus Pa vn yỽ ty duỽ. a|r pres+
sỽyluaeu ỻawer. Magister Ty duỽ yỽ gỽelet duỽ dat hoỻgyuoethaỽc.
ac yn|y gỽelet hỽnnỽ y ỻywennycha y seint megys myỽn ty
y pressỽyluaeu a|r kyuanhedeu yỽ o amryuaelyon lỽytheu.
a|thaleu dros eu gobrỽyeu. discipulus A|wybyd yr|eneidyeu yr|hynn a|w+
neler yma. Magister Yr eneidyeu kyfyaỽn a wybydant bop peth o|r a
wneler. y rei yssyd yn|y purdan hagen ny|s|gỽybydant ony|s
menyc engylyon neu seint udunt. a|r rei yssyd yn uffern nyt
mỽy y gỽdant ỽy beth yssyd yma. noc y gỽdam ninneu beth
| « p 51r | p 52r » |