LlGC Llsgr. Peniarth 32 (Y Llyfr Teg) – tudalen 199
Llyfr Iorwerth
199
y buant yn|y vechni. nyt enwit hi eissoes y|r
dyn a|e kymerth. ac ỽrth hynny ny dyly hỽnnỽ
na|r uechni. na|r da. na|r haỽl. pei ry enwei y
mach y hỽnnỽ y vechni. reit vydei e|hun talu
y da hỽnnỽ. ac ỽrth na rymha y mechniaetheu
hynny; y gelwir ỽynteu yn valaỽc vechni. Sef
yỽ ystyr y geir hỽnnỽ. annỽyt balaỽc yỽ; rỽy+
maỽ yn da yny ỽrthỽyneper. A phan dynher
yn y wrth·ỽyneb; y goỻỽg y rỽym. Ac ueỻy y
maent y mechniaetheu hynny. pan ỽrthỽy+
neper udunt ny safant. Teir mefylỽryaeth
mechni; Y gỽadu. a|e cham·eturyt. ac na aỻer
y chymeỻ. O deruyd. y vn o sỽydogyon y ỻys gỽa+
du mach. neu y ỽr o|r teulu a vo ar vỽrd y
brenhin. yg|kapel y brenhin y dyly y wadu; kanys
yno y|dyly ef y dỽfyr sỽyn a|e vara offeren.
O|deruyd. y ỽr diatlam namyn kylch idaỽ. neu y
uonhedic canhỽynaỽl gỽadu mach; kyfreith. a|dyỽ ̷+
eit panyỽ yn|yr eglỽys y gordiweder kyfreith. arnaỽ
yn phlỽyfogaeth. y dyly y wadu. kannyt
mỽy y dyly y dỽfyr sỽyn a|e vara offeren yn
un eglỽys no|e gilyd. O deruyd. dyuot haỽl mach
a|chynnogyn rac deulin ygnat. a bot yr haỽl+
ỽr a|r mach a|r kynnogyn yn ỻe. a holi o|r
haỽlỽr ac atteb o|r amdiffynnỽr hyt na dyly+
ei ỽrtheb y dyd hỽnnỽ. o achaỽs y vot gỽedy
| « p 198 | p 200 » |