Llsgr. Caerdydd 1.363 (Hafod 2) – tudalen 150r
Brut y Brenhinoedd
150r
ỽarfey ac ef kan galw enw dyw. o ỽn dyr+
naỽt y lladey. Ac ny orffwyssavd o|r rỽth+
yr hỽnnỽ hyt pan ladaỽd a chaletwulch
e hỽn tryvgeynwyr a phedwar kant. Ac g+
wedy gwelet o|r brytanyeyt henny tewhaỽ
eỽ torỽoed a gwnaethant. a|e ymlyt enteỽ
ac o pob parth ỽdỽnt gwneythvr aerỽa.
Ac en e lle y dygwydassant colgrym a bald+
wlff y ỽraỽt a llawer o ỽylyoed y gyt ac
wynt. Ac|gwedy gwelet o cheldrych pery+
gyl y kytymdeyon* en e lle hep annot ymch+
welỽt a orỽc y gyt ar rey ereyll ar ffo hep
AC gwedy arỽerỽ o|r bre +[ ỽn annot.
nyn o|r wudỽgolyaeth ef a erchys y ca+
dwr yarll kernyw erlyt e ssaysson hyt tra ỽ+
ryssey yr alban. kanys mynegy a gwnath+
oydyt ydaỽ bot e ffychtyeyt ar yscotyeyt
wrth kaer alclỽt e lle ry adawssey entev
howel y ney en glaf. Ac wrth henny e bry+
ssey enteỽ y ỽynnỽ y rydhaỽ entev y gan y
elynyon. Ac odyna tywyssavc kernyw a
dec myl y gyt ac ef. ac nyt en ol e ssaysson
| « p 149v | p 150v » |