Rhydychen, Llsgr. Coleg yr Iesu 111 (Llyfr Coch Hergest) – tudalen 191v
Geraint
191v
774
atueiledic ac yndi neuad drydoll. ac ỽrth nat
atwaenat neb yn|y dref mynet a|oruc y|r hen llys.
A|gỽedy dyuot ohonaỽ parth a|r|llys. ny welei
hayach namyn lofft a|ỽelei. a phont o uaen
marmor yn|dyuot o|r lofft. ac ar|y bont y gỽelei
gỽr gỽynỻỽyt yn eisted. a hen dillat atueiledic
ymdanaỽ. Sef a|oruc gereint arnaỽ yn graff
hirhynt. Sef y dywaỽt y gỽr gỽynỻỽyt ỽrthaỽ.
a uaccỽy heb ef. pa uedỽl yỽ y teu di. Medylyaỽ
heb ynteu am na ỽn pa|le yd af heno. a deuy di
ragot yma unben heb ef. a|thi a geffy oreu a
gaffer itt. a dyuot racdaỽ a|oruc a|chyrchu a|o+
ruc y gỽr gỽynỻỽyt y* gỽr* gỽynỻỽyt* y|r neuad
o|e vlaen. a disgynnv a|oruc yn|y neuad ac adaỽ
yno y uarch. a|dyuot racdaỽ tu a|r lofft ef a|r
gỽr gỽynỻỽyt. ac ar y|lofft y gỽelei gohenwre+
ic yn eisted ar obennyd. a|hen dillat atueile+
dic o bali ymdanei. a|phan|uuassei yn|y ỻaỽn
ieuenctit. tebic oed gantaỽ na welssei neb wre+
ic degach no hi. a morỽyn gyr y|ỻaỽ a chrys
a|ỻenỻiein ymdenei gohen yn|dechreu at·ueilaỽ.
a diheu oed gantaỽ na welsei eiryoet un uorỽ+
yn gyflaỽnach o amylder pryt a|gosked a|thele+
diỽrỽyd no hi. a|r gỽr gỽynỻỽyt a dywaỽt
ỽrth y uorỽyn. Nyt oes was y uarch y mac+
kỽy hỽnn heno namyn tydi. Y gỽassanaeth
goreu a|aỻỽyf|i heb hi mi a|e gỽnaf ac idaỽ
ac y uarch. a|diarchenu y makỽy a|oruc y
uorỽyn. ac odyna diwaỻu y march o|weỻt
ac yt. a chyrchu y|r neuad ual|kynt a|dyuot
y|r loft dracheuyn. Ac yna y|dywaỽt y gỽr
gỽynỻỽyt ỽrth y uorỽyn. Dos y|r dref heb|ef
a|r traỽsgỽyd goreu ac a|eỻych o|vỽyt a|ỻynn
par dyuot yma ac ef. Mi a|wnaf yn ỻaỽen
arglỽyd heb hi. ac y|r dref y doeth y uorỽyn. ac
ymdidan a|orugant ỽynteu tra uu y uorỽyn
yn|y dref. ac yn|y ỻe nachaf y uorỽyn yn|dy+
uot a gỽas y·gyt a|hi. a chostrel ar y geuyn
yn ỻaỽn o ued gỽerth. a chỽarthaỽr eidon ieu+
anc. ac y·rỽng dỽylaỽ y uorỽyn yd oed talym
o|uara gỽynn. Ac un coesset yn|y ỻenlliein.
ac y|r|lofft y|doeth. Ny eỻeis i heb hi traỽssgỽyd
weỻ no hỽnn. ac ny chaỽn uyg|credu ar weỻ
no hynn. Da|digaỽn heb·y gereint. a|pheri
berỽi y kic a|orugant. A phan|uu baraỽt eu
bỽyt ỽynt a|aethant y eisted. Nyt amgen.
775
Gereint a eistedaỽd y·rỽng y gỽr gỽynllỽyt
a|e wreic. a|r uorỽyn a|wassanaethaỽd arnunt.
a bỽyta ac yuet a|orugant. A gỽedy daruot bỽy+
ta. dala ar ymdidan a|r gỽr gỽynllỽyt a|oruc
gereint. a|gouyn idaỽ ae ef gyntaf bioed y llys
yd oed yndi. Mi ys|gỽir heb ef a|e hadeilaỽd.
a|mi bieiuu y dinas a|r casteỻ a|ỽeleist ti.
Och a|ỽr heb·y gereint. paham y coỻeist dith+
eu hỽnnỽ. Mi a|goỻeis heb ynteu iarỻaeth
uaỽr ygyt a hynny. a llyma paham y coỻeis.
Nei uab braỽt a|oed im. a chyuoeth hỽnnỽ
a|r meu vy hun a|gymereis i attaf. a phan
doeth nerth yndaỽ holi y gyuoeth a|wnaeth.
Sef y kynheleis ynheu y gyuoeth racdaỽ ef.
Peri a|oruc ynteu ryuelu arnaf|i. a|chynny+
du cỽbyl o|r a|oed y|m|ỻaỽ. a ỽrda heb·y gereint
a|uenegy di y mi pa|dyuotyat uu un y march+
aỽc a|doeth y|r dinas gynneu. a|r uarchoges
a|r corr. a phaham y mae y darpar a weleis i
ar|gỽeiryaỽ arueu. managaf heb ef. Dar+
par yỽ auory ar chware yssyd gan yr iarỻ
Jeuanc. Nyt amgen dodi y|myỽn gỽeirglaỽd
yssyd yno dỽy fforch. ac ar y dỽy fforch gỽial+
geing aryant. a ỻamhystaen a|dodir ar y
wialgeing. a thỽrneimeint a|uyd am y|ỻamhys+
daen. A|r niuer a|weleist di yn|y dref oỻ o wyr
a|meirch ac arueu a|daỽ y|r tỽrneimeint.
a|r wreic vỽyhaf a|garho a|daỽ ygyt a|phob
gỽr. ac ny cheiff ymwan am y ỻamystaen
y gỽr ny bo gyt ac ef y wreic vỽyhaf a|garho.
a|r marchaỽc a|weleist di a gauas y ỻamhys+
taen dỽy vlyned. ac o|r keiff y dryded ulỽydyn
y hanuon a|ỽneir idaỽ pob blỽydyn wedy hyn+
ny. ac ny daỽ e|hun yno. a marchaỽc y ỻam+
hystaen y gelỽir y march* o hynn allan. a ỽrda
heb y gereint mae dy gynghor di y mi am y
marchaỽc hỽnnỽ. a|m sarhaet a|geis gan y
gorr ac a|gauas morỽyn y wenhỽyuar gỽre+
ic arthur. a menegi ystyr y sarhaet a|oruc
gereint y|r gỽr gỽynỻỽyt. Nyt haỽd ym rodi
kynghor itt kanyt oes na gỽreic na morỽyn
yd|ymardelỽych o·honei. yd|elut y ymwan a*|ef.
arueu a|oed y mi yna y rei hynny a|gaffut ti.
ac o|r bei weỻ gennyt uy march i no|r teu dy hun.
a wrda heb ynteu duỽ a|dalo it. da|digaỽn yỽ
gennyf|i vy march vy hun yd ỽyf i yn gynneuin
| « p 191r | p 192r » |