LlGC Llsgr. Peniarth 11 – tudalen 195v
Ystoriau Saint Greal
195v
ni a anuonỽn y meirch yma idaỽ ynteu. Nyt amgen no
deu idaỽ efo. ac vn y|r marchaỽc yma yr eu|dwyn ỽynteu. a|r
kyuanned yma a|r tei a|r|da ni a|e rodỽn y|r morynyon yn ỻe
eu kỽrteissi. a|ni a|e gỽarantỽn udunt dan yn perigyl ni tra
vom ni vyỽ. Gỽalchmei heb·y paredur ỻyna dywedut yn da.
A Rglỽydi heb y marchaỽc y mae udunt ỽy ryỽ otua
yn|y fforest honn yn|y ỻe y rodynt ỽy eu ỻetrat ac eu
hyspeil. ac eu trysor. Ac y mae o|da udunt ỽy yno a|wnelei les y
lawer o eissywedigyon. ac ar hynny ỽynt a gerdassant ac a
doethant tu a|r ỻe hỽnnỽ. ac yno ỽynt a gawssant amylder o
da myỽn seler y·dan y daear. yr honn a|oed yn|ỻaỽn o|eur ac
aryant a thrysor a thlysseu tec. a ỻestri maỽrweirthyaỽc ac
arueu a diỻat. ac yn ỻe araỻ yd oedynt kyrff gỽyr ỻadedic.
Laỽnslot heb·y paredur ys maỽr a alwyssen a|wnaethost ti diua
y bobyl drỽc honn. Wyntỽy a|m diuayssynt i pei as|gaỻyssynt
heb·y laỽnslot. Eissyoes nyt dim yssyd drỽc gennyf onyt|ỻad
y vorwyn. ac o|m anuod y gỽneuthum i hynny. kanys megys
y mynnassỽn i|daraỽ vn onadunt ỽy y disgynnaỽd y|dyrnaỽt
arnei hi o|e ffolineb e|hunan. Nac ef heb y marchaỽc ỻyna
weithret da vu y ỻad hi. kanys ỻawer dyn a|odefaỽd y angeu
drỽy y thỽyỻ hi a|e brat Yna gỽalchmei a|pharedur. drỽy gyt+
synnedigaeth laỽnslot a roessant y da a|r trysor y|r moryny+
on o|r casteỻ tlaỽt. ac a|anuonassant gennat yn ol ioseus veu+
dỽy y gadỽ y da yny delei y morynyon yno. A|r|Meudỽy a|dy ̷+
waỽt y gỽnaei ef hynny yn ỻawen. a digrif vu ganthaỽ dar+
vot eu diua. kanys ỻawer nosweith drỽc a|gaỽssoed ef gan+
thunt ỽy. yr ovyn ac aruthtra y marchaỽc a ymwahanaỽd
| « p 195r | p 196r » |